أن نسمع ما يحدث حولنا لهو شديد الإختلاف عن أن يقترب منا!
إحنا ليه ذاكرتنا قصيرة؟ إنت عملت ثورة وطلعت عين أم الشرطة فيها، وانت بردو اللي هتفت يسقط حكم العسكر؛ أليس ذلك كان بالأمس القريب؟ إزاي دلوقتي مآمنلهم أوي كده؟ إزاي قلبك مطاوعك؟ .. مرسي مش هيرجع تاني زي ما البني آدمين اللي بيروحوا كل يوم سواء ملهمش ذنب أو بيدافعوا عن قضيتهم مش هيرجعوا تاني! وحكم العسكر إستحالة يكمل! مش كل المؤيدين إخوان ومش كل المعارضين فلول..حكموا ضميركم وإتقوا الله يجعل لكم مخرجاً...
قال تعالي: "وَمَن يَقْتُلْ مُؤْمِنًا مُّتَعَمِّدًا فَجَزَاؤُهُ جَهَنَّمُ خَالِدًا فِيهَا وَغَضِبَ اللَّهُ عَلَيْهِ وَلَعَنَهُ وَأَعَدَّ لَهُ عَذَابًا عَظِيمًا"
أرهقنا الموت السهل والحياة الصعبة! .. يا الله أن كان الموت شهادة لنا عليهم يوم الحساب فأتم لنا الشهادة في حرب تحفظ لنا الروح .. يا الله إرزقنا بدموع تكفي الموت كي لا نعتاده!
أي هزلية وسيريالية دموية هذه؟! المبررات واهية لا أقبلها شخصياً. بغض النظر عن كل حاجة وأي حاجة، بذاءة الشعب تعتبر طهر وبراءة بجانب بذاءة الحكام!
الضحايا كتير والوجع أكتر .. ناس قضيتها دلوقتي "هو يستحق لقب شهيد" -مع العلم إن دا بتاع ربنا لأننا منعرفش نيته كانت إيه- بس القضية هنا "هو كان بيتعامل بالطريقة اللي يستحق بيها لقب إنسان" ؟؟ .. شهيد مش شهيد واجب علينا نقراله الفاتحة وندعيله حتي واحنا في بيوتنا..
اللي بيموتوا بيصبحوا "ورود الوطن" بس بعد ما إرتوت أرض الوطن بدمه؛ لكن طول ماهو عايش فهو مُهمش علي الخريطة!
الموت ملوش مكتب تنسيق يا سادة .. الأسي علي اللي مات قبل مايكمل دراسته وقبل مايتجوز مش أكبر من الأسي علي اللي مات عاطل قعد سنين يدور علي وظيفة لكن بلا جدوي! كلهم ضحايا وكلهم ولاد ناس يتزعِل عليهم حتي واحنا مانعرفهمش!
توقفت عن متابعة صور المقتولين، فهي لا تبعث عليّ الإحباط والعجز بقدر ما تبعث عليّ البكاء! لا أود أن أعرف المزيد عن قبح هذا العالم! حقاً ان السياسة شئ قذر.